謝賢昨日在台灣接受商台節目《茶煲裏的查篤撑》電話訪問，對於兒子謝霆鋒近日在台灣發生涉嫌毆打記者一案，他表示十分關注，且比霆鋒更早到達台灣了解事件。
問到霆鋒現時的心情時，謝賢說：「佢OK呀！我哋開過會，霆鋒同班同事重演咗一次當時情形畀我睇，佢哋講嘅嘢都一致，霆鋒冇郁過手打佢。」
至於有指王菲與四哥在台灣同住一間酒店，四哥半開玩笑說：「酒店幾百間房我都巡過，都唔見佢嘅蹤迹，我都想搵佢呀！想幫吓個仔呀嘛。」問到他會否覺得王菲在台灣能幫到霆鋒時，四哥說：「唔需要幫，都係等佢哋兩個happyhappy之嘛。」問到霆鋒有否向他提過想結婚時，他說：「佢冇提過喎，呢個係謠傳嚟嘅。呢啲係個仔嘅私人事同佢感情上嘅嘢，我一啲都唔理，唔會參加意見。」