董家班「閉關」兩日，話要學習用新思維管治政府，但聽嚟聽去，八方都唔明乜叫新思維？可能係人同此心，港台最近特登搞咗個新節目，搵咗城中一班著名大企業嘅行政總裁，同啲香港公開大學學生講吓佢哋嘅管理新思維及成功秘訣，節目就叫做《與CEO對話》，呢個星期起逢禮拜日出街。
被邀請嘅CEO都係猛人，包括九鐵田北辰、總商會翁以登、醫管局何兆煒、九巴陳祖澤、渣打王冬勝、賽馬會黃至剛等等，重有電盈嘅「小小超」李澤楷㖭，打頭炮嘅就係「田二少」。
八方聽聞，田二少喺訪問中好坦率。佢話，九鐵嘅管理策略同佢以前搞G2000好唔同，做成衣生意最多睇一個月，不斷求變，但管九鐵就相反，要睇好長期，改一截鐵軌都要慎重考慮。佢又話，佢從來唔容許下屬講「NoComment」，一定要佢哋講出自己心中意見。
另外，田二少又第一次講咗唔少佢嘅家庭生活，包括佢點樣同四個仔女溝通，又猛冧佢太太，對住個咪叫要同佢白頭偕老喎！
傳真︰2623-9278
電郵︰