周一曾經提過美股杜指可能會試8500至8600，原來係趙飛雲太保守，周一晚美股再度勁升，杜指再升447點，升幅5.4%，以8711收市。
美股淡友今次真係俾人挾到暈，杜指4個交易日升咗1009點，升幅13%，大部份人都諗佢有回吐，所以噚日港股早市雖然最多升過310點，高見11285，但期指結算大局已定後，午市已經見獲利回吐，恒指升幅收窄至179點，收10155。
雖然趙飛雲心痕手癢，但港股噚日裂口高開，高追隨時會坐艇，所以按兵不動。恒指噚日升179點，升破短期下降軌阻力，9RSI亦升破短期降軌，技術上有改善，但高開低收反映唔少人食胡離場，對後市信心不足。
杜指4日內勁挾兩鋪近500點，斷估冇咁快有第3鋪，點都要整固吓，因此短期港股唔易升穿10400阻力，反而先出現整固機會大。趙飛雲短期策略炒超短線，目前短期下降軌支持約在10020，而5日線在9952，可在9952-10020區域伺機博反彈，升近10400不破則食胡。
杜指技術指標已發出轉勢訊號，但今個禮拜相當多重要經濟數據，例如今晚公布第2季GDP，因此要預咗美股可能出現過山車走勢。若美股轉勢訊號冇錯，則港股後市亦可睇高一線。
趙飛雲