報紙報道，美國馬利蘭州嘅淡水湖泊，中國生魚充斥，繁殖速度極快，將河內湖裏的其他魚類，食到幾乎無法生存，變成生魚獨大。生魚而且游到其他河流，如果唔人為阻止生魚繁殖嘅話，生魚會進侵密芝根湖，完全破壞淡水湖泊現存嘅自然生態。
唔睇唔知道生魚原來咁厲害，左丁山只係知道生魚煲西洋菜，好好味，炒生魚球亦佳，唔知呢種魚會破壞自然生態。既然咁巴閉，點解中國咁多年都冇人講呢個問題嘅？係中國人唔識吖，還是生魚移民美國後，先至成為科學怪魚呢？難道生魚會變種？
呢日食午飯時，大家傾起，前輩賓架話：「大概美國人唔識食生魚，冇人去捉，任佢生，所以搞到美國佬頭痛。」此言未必無理，中國咁多人鍾意食魚，多多都唔夠食。如果係咁，美國大可做生意，叫漁民猛咁捉生魚，運嚟香港深圳，益吓我哋都好吖。不過美國人未必肯做或識做呢啲生意噃，葉澍堃、唐英年、廖秀冬三位局長不如合作，叫漁護署訓練啲雙失青少年捉魚，邀請本港商人合作，送啲受過訓練嘅青少年漁夫去馬利蘭州捕捉生魚，分分鐘美國佬肯畀埋機票包食宿㖭，如此可以促進中美關係，減輕美國人殺魚嘅費用，降低本港失業率，減少雙失青少年數字，益埋香港消費者，都唔知係一個幾多贏嘅方案！唔好以為左丁山講怪論，我有point㗎！