有頭冇尾，正是昨日眾多Call輪之寫照。受美股隔晚大升刺激，一眾Call輪甫開市就搶閘，有啲一升就十幾二十個位。可惜午後美股期指下挫，8月期指首先唔掂，拖住大市回落，Call輪升幅跟住收窄，個別溢價大嘅更要倒跌收場。
恒指昨日雖然不致倒跌，但走勢確有少少肉酸。美股連日急升後，已升近重要阻力位，睇嚟港股會先隨美股整固，然後再上。
樂觀啲睇，港股即使有調整，幅度亦未必會好深，可能只係兩百點貨仔，𠵱家買Put輪去博，唔係幾化算，倒不如等恒指回試1萬點水平，再揸過Call輪。
候低番炒嘅對象，包括近日提過嘅恒指Call輪9174同9201（如果諗住揸就要揀9390同9408），以及長實輪9252同和黃輪9245。
華潤創業（291）昨日大升6%，另1隻大紫籌中信泰富（267）嘅窩輪要留意。中信泰富走勢似營造雙底，短期有機會先試17.85元頸線阻力。中信輪成交比較冷落，較多人買賣嗰件9037，數據亦唔錯，一於揀佢。
章盛