睇嚟港交所除牌機制建議風波，已經變成一場政治鬥爭，有關官員家陣好唔得閒，掛住你推我讓唔肯揹鑊。
聽班經紀朋友講，原來成班莊家都好關心呢件事，處心積慮同政府對着幹，以免除牌建議一旦落實，佢哋成手垃圾股變成廢紙就大件事。
大批莊家最近都專注喺呢件事上面，股票嘅事放手畀馬仔搞。經紀黃話，二三股仔前景仍未明朗，不如留意吓有盈利同埋有基金睇中嘅中小型股，其中以前叫做頂益，剛剛改名嘅康師傅（322），周五公布中期業績，可以留意。
雖然康師傅今次業績估計唔差，但現時股價就真係唔便宜，家陣股價重有成2.275元，同52周高位2.475元相距唔遠。
經紀黃話，皆因有班大行坐咗唔少貨，同埋台灣幫全力護航，先至有咁嘅表現。小初心諗，康師傅都係只宜短炒。
慕容小初