名廚鍾錦逆市喺尖沙嘴美麗華商場開多間東海海鮮酒家，恒基地產主席李兆基噚日盡「地主」之誼，帶埋二公子李家誠捧場。八方見到「四叔」，當然要問吓佢，早排有人話佢同一位打扮高貴嘅女士同遊瑞士嘅緋聞。
「四叔」講到緋聞不但冇黑晒口臉，重反串八方咁話：「我夠見到你同個靚仔一齊囉。」佢話事件係美麗的誤會，當日佢只係與四個好友同遊瑞士，三男一女，其中一對係夫婦，個「靚太」係「朋友妻」。佢叫大家以後唔好咁多心。
噚日重有個重量級嘉賓到場，就係新世界發展主席鄭裕彤。八方問彤叔，點解變咗神秘嘉賓？佢好鬼馬咁話：「有嘢食我咪嚟囉。」
講到食當然要搵鍾錦，鍾大廚噚日專登開咗支五公升嘅九三年「武當」宴客，唞氣都用咗三個鐘。
八方問佢煮乜畀四叔同彤叔食？鍾大廚話，都係鮑魚官燕之類。佢話，四叔同彤叔咁嘅年紀，鍾意食清淡啲嘅食物，不必要鮑參翅肚。
呢排成日有酒樓結業，鍾錦就話冇有怕。佢話，做飲食業的秘訣係「價錢公道，功夫十足」。八方話間間酒樓都係咁樣講，佢就贈多八方五字：「勞資成一體」，可說係十六字真言。
（圖）彤叔（左）與四叔（右三）前來賀鍾錦（右）的東海海鮮酒家開分店。
傳真︰2623-9278
電郵︰