李瑋峰到英超聯比賽條路就一定唔容易行，出發到英倫之前又遇到簽證問題，對佢日後嘅發展影響都幾大。
原來，李瑋峰同李鐵稍後去英倫都係攞住商務簽證，但係「大頭」李瑋峰嘅情況同李鐵唔同，佢上次去英國進行商業活動時，只係辦理單次出入境簽證；今次攞簽證就遇到麻煩，要延遲到周五、六先可以搞掂，唔可以同李鐵一齊起行。
老實講，中國球員要喺英超聯立足，好大程度上同季前熱身賽表現掛鈎，事關做領隊嘅都希望透過季前熱身賽，觀察邊個球員狀態較弗，決定埋今季正選陣容，所以李瑋峰愈遲向愛華頓報到，今季出場機會就會愈微。佢重話想繼續幫深圳科健出場比賽，似乎「大頭」唔係好了解英超聯球員爭取上陣機會嘅激烈程度噃！
意甲聯球員上屆成日炒車，其中布雷西亞嘅美路重因此而不幸喪命，我求大俠以為佢哋已經吸取咗教訓，點知佢哋嘅龍門沙連尼同埋前鋒泰爾，日前竟然又炒車，揸車嘅泰爾話架車突然失控撞牆；不過好彩兩人只係輕傷，但沙連尼都要唞三至五個月。真係唔知佢有冇小心駕駛，定抑或真係咁邪。
沙治去咗馬德里體育會後，巴塞隆拿要搵番個隊長，話說雲高爾好民主，用球員投票去決定隊長臂章屬誰，最後老將安歷基當選；呢個選擇都幾合理，因為巴塞隆拿係一個地方色彩好濃嘅地方，一定要由西班牙人去領導。我求驗客認為，安歷基上屆好多時坐冷板櫈，今屆睇嚟有得踢，重做埋「喼頓」，應該要多謝雲高爾囉。
雖然皇馬會長佩雷斯表明將唔會買球員，令唔少球評家都替佢哋擔心，但係隊中後衞卡洛斯就舉腳贊成，因為佢認為球會咁做即係信班球員。之不過我求驗客認為西甲聯重有成個月至開波，以皇馬嘅性格可能已經部署買人策略，總之就係好似過去兩屆先後買入費高同施丹咁，不鳴則已，一鳴驚人，各位睇住嚟啦！