唔少新樓入伙之後先至發現陷阱處處，執漏有排煩。業主好想知，交樓之前，發展商究竟做過乜？向以質素做賣點嘅新地，昨日公開監察樓宇嘅步驟，讀者可以大開眼界。一般最關心相信係地板、窗門同浴缸。
原來鋪地板之前，先要測度地台平唔平。新地近年用激光平水儀測試地台，稍有偏差，儀器都會響，工程人員就修正。跟住測濕度、試防水性能，全部合格之後鋪上地板就保證平滑。地板會用兩款濕度探測儀測試底面濕度。若果地台唔乾透就鋪地板，地板第日好易發霉同彎曲變形，手尾長。
窗台滲漏係最常見嘅問題。新地話，每個單位都會用加壓水鎗噴射，睇吓窗框防水膜與抆泥掂唔掂，有冇漏水。強化玻璃，要經量度厚度及敲擊測試，保障住客安全。原來窗框電鍍防水膜，厚度都有一定標準㗎。
浴缸也有安裝程序，地台會用水浸一晚，睇吓防水膜有冇漏水，先至裝上浴缸。
其他少為人注意嘅，好似門板，實心門會抽樣拆開測試濕度，空心就拆開睇睇結構合唔合格，先至安裝。
唔講唔知，原來一個單位要check成二百幾項，OK先至可以交得樓。豪宅好似跑馬地禮頓山，要check嘅就重多。
最近入伙嘅將軍澳清水灣半島二期，交樓前原來查過萬三個鋁窗，而洗手盆、坐廁與浴缸，就夾埋七千個，插蘇都查過萬九個。
新地工程監察部發展項目顧問陸宏廣話，公司咁做，雖然令成本加重1%，但減少執漏就慳番2至3%，計落有着數。當然，贏到客人口碑，鞏固商譽就更加係無價寶！佢話近期入伙嘅幾個樓盤，近兩成係「零執漏」。
新地夠膽自爆驗樓方法，原來佢哋重有本秘笈收埋，所有員工可以跟住做，達到統一標準及提升水準。呢本秘笈係新地積累多年起樓到交樓、工程常見錯誤事例，結集成工程手冊，圖文並茂，等員工知道點樣處理，資料重係不斷update㖭。佢哋對本書極度重視，唔肯公開畀記者。大家學嘢嘞，經驗真係無價寶！
賣樓梗要做宣傳，引人注意最好搵明星幫手。廖創興企業深明此道，上個禮拜請來藝人吳文忻，做九肚山皓朗山莊皓朗盃頒獎嘉賓，今日又請得人氣藝員百萬富翁陳啟泰做特別嘉賓。
原來廖創興企業今日公布物業特設嘅「優遊計劃」及最新銷情，重請陳啟泰與各地產代理高層代表，玩一次皓朗版「千萬富豪」遊戲。皓朗山莊單位，最平都要差唔多千五萬，買得起嘅，睇嚟都唔止千萬富翁咁簡單。
馬灣珀麗灣宣傳攻勢浪接浪，話說新地禮拜一開放示範單位，中原一眾高層都捧場。聽講施老闆、黃偉雄與陳永傑，各自認購咗一個單位。施老闆就打算畀員工做度假屋，不過，要做到數先有得住。咁咪變成身份象徵？
馬灣島將有間基慧小學，係band1名校，原址喺荃灣。啲代理明知學生家長會因遷就仔女返學而搬入馬灣，所以一早碼實佢哋。班家長則與新地接洽過，下個禮拜六重會組隊去馬灣實地視察。
講番新地禮拜一播放珀麗灣短片，事件重有下文。原來香港置業都拍咗一套珀麗灣環島專輯，係上個禮拜二遊船河睇珀麗灣時拍攝，介紹樓盤外觀及附近風景。港置執行董事陳坤興、董事胡日發與助董胡栢榮重粉墨登場。
套片長十分鐘，會喺新都會7樓播放。大家睇完新地套片，覺得唔夠喉嘅話，可以再上一層樓，睇埋另一套。
蘭西
電郵地址：