楊紫瓊與男友鍾再思同埋佢個女Christina、重有張國榮、梅艷芳（阿梅）、蕭亞軒同何超瓊等，前晚去咗UA金鐘欣賞新片《天脈傳奇》首映，然後成班人又去咗金鐘太古廣場一間餐廳開派對。
鍾再思個女Christina啱啱喺英國放假返嚟香港，佢前晚着咗件低胸裝出現，非常性感。鍾再思話：「佢每年都會返嚟探我。」問到鍾再思個女同楊紫瓊相處成點？鍾再思笑住話：「今晚我哋嚟睇戲。」但楊紫瓊被問到有關鍾再思個女嘅問題，佢就有啲黑面。
早前有傳演藝人協會有意再對傳媒「封嘴」，鄭經翰日前話咁樣會影響新聞自由，重話啲藝人之前挺董，𠵱家又要搵番特首董建華着數。
身為該會會長嘅阿梅話：「嗰啲所謂大班（指鄭經翰），唔知真相就亂吠，搞到人心惶惶，可能有人想博出位，上幾日頭條。我呢個會長位係箭靶，而且都冇送過信畀特首，未去到呢個階段。」
蔡少芬（Ada）噚日返電視城為劇集《黑夜彩虹》拍攝宣傳海報，Ada話佢已經向公司請假，稍後會去美國登台之餘順道探朋友，當係旅行休息一吓，Ada話：「其實我最想去希臘，但重搵緊對象，都搵咗陳慧珊同洪欣，不過未必度到期。」
提到當地最興天體浴，Ada即刻話：「如果真係我實殺晒，不過無謂益人啦。」
何韻詩噚日出席喺中環世貿廣場舉行嘅商台活動記者會，其實佢𠵱家忙於灌錄新唱片，阿詩話：「我張碟預計九月推出，新碟風格同以前嘅唔同，今次隻碟整體會溫柔啲，感覺女性化啲，好似一隻小品，但係就唔會刻意扮斯文，其實只係希望俾人唔同嘅感覺。」
麥浚龍（Juno）噚日去咗新城接受薛家燕（好姨）《家天下》訪問。Juno同好姨個大女珊珊係中學同學，所以珊珊專登搵Juno做嘉賓，珊珊重踢爆Juno讀書嗰時好靜，不過後尾熟絡咗先覺得Juno其實好好人，而好姨就講話要Juno入《皆大歡喜》做鄧兆尊個細佬。
吳君如早前簽咗一間內地經理人公司，幫佢接內地嘅工作。對於近日謝霆鋒話要退出，君如反應好大咁話：「唔係啩？佢係咪想休息吓，但我覺得有壓力先至有原動力，其實霆鋒得二十一歲已經有好多嘢，而個天都好錫佢，起碼佢有幾部靚車，而我想買架波子都唔捨得。」
王秀琳（Mango）噚日去藍田香港哮喘會探訪，教小朋友打羽毛球。佢講番上個星期六下晝揸架新車去探朋友，點知俾架小巴揩花車頭，而個小巴司機只係肯賠幾百蚊了事，搞到Mango好激氣，跟住又有雜誌記者喺馬路中間影佢相，結果Mango要報警求助，前後擾攘咗成兩個幾鐘，佢先可以揸車返屋企。