海外車訊：
富豪S60R夠勁

嚟緊9月法國巴黎車展上，富豪車廠將會展出兩部，備有相同技術嘅S60R高性能房車及V70R高性能旅行車；兩者除造型顯現有一份辛辣味外，出色嘅底盤及懸掛配搭，同埋強勁性能表現，都成為佢哋嘅賣點。今日不如一齊先睹為快，睇睇當中嘅S60R有何過人之處啦。 記者：鄭達基

跑車化造型添魅力
先從外形方面說起，S60R嘅車身線條與原來S60房車相近；但當細心留意下，你就會發覺車首部份裝有大型生風導入口及擾流器、四邊鍍有啞銀色嘅黑色鬼面罩，同埋17或18吋刻有R字樣嘅跑車合金胎軨，一派高性能跑車形象表露無遺。

車廂豪華舒適度高
而S60R嘅車廂布局，仍貫徹有富豪汽車一貫嘅豪邁氣派，當中一雙前排桶形跑車座椅，除以高級真皮鑲嵌而成，乘坐倍見妥貼舒適外，表板上四個圓表皆以鮮藍色襯銀色框邊示人，望落份外突出吸引；而三幅式跑車軚環，更以藍色粗線縫上真皮，以配合車廂表板嘅色調，當然唔少得重有設備齊全嘅中控台，同埋多項安全設施，以確保車上乘客安全啦。

300匹馬力表現強勁
廠方為S60R配用一台2.5公升五汽缸Turbo引擎，馬力輸出高達300匹，而40.8kgm嘅扭力輸出峯值，則於引擎處於2100rpm時發出，配上一套6前速手波或5前速Geartronic半自動波箱，因而令性能表現更見強勁；難怪新車手波版嘅0至100公里加速度，需時僅為5.8秒（初步數字），而極速更可高達250km/h咁快啦。

4-C技術倍添駕駛樂趣
駕駛者可透過設於中控台嘅三個按鈕，選擇Comfort、Sport及AdvancedSport嘅駕駛模式，以迎合不同駕駛需要；能夠有以上功能，都係全靠連續可調校車架系統4-C（ContinuouslyControlledChassisConcept）技術及出色嘅懸掛系統所賜，佢能夠搜集大量車子在行駛時嘅資料，並能在極短時間內調校吸震筒及調節電子控制嘅四驅系統，從而令新車可有更出色嘅操控表現。