美股3大指數勁升逾5％，港股噚日期指結算，好友早市係咁意將恒指挾高300點，都算客氣。恒指午市走晒樣，全日只升179點，收10155。大市真係頗為虛弱，相信同市場預期美股後市不繼有關。
雖然港交所除牌機制建議引出軒然大波，但同時亦令不少公司「發憤圖強」，其中包括金禾（090）、聯洲國際（048）、聯洲珠寶（926）隨即宣布合併股份。新世界數碼（276）話不排除進行回購；恒豐金業（870）隨即入市回購；邦盟滙駿（8158）董事入市增持，穩定股東信心。
不過，靠合併及回購維持股價始終唔實際，最好當然係公司有盈利兼派息和味，好似新高準（690）咁就真係唔錯，市值雖不足2億元，但全年賺3000萬元，每股派末期息0.10元，以收市價1.01元計，揸1個月左右就收息9.95厘，不過股份異常歸邊，好難低價買到。
比亞迪（1211）原本係百記民企上市重頭炮，不過市場氣氛差，吸引唔到散戶落飛，公開發售1.4倍超購，國際配售只得足額認購，結果以中間價10.95元定價。傳就傳話暗盤價介乎11.05元至12元，但Cookie話暗盤成交價應在11元水平左右，絕對冇12元咁高。今日掛牌，唔好對此股抱太大奢望，不過亦由於超購倍數唔多，要炒起佢，亦毋須太長時間進行收集。
另外，阿虎收到風，停牌兩日嘅大凌（211）因應上周五細價股股災市況，決定押後供股，並會重新審議一個更佳嘅條款，稍後會有公布。大凌今次咁做，總算向股東有交代，希望其他細價股董事借鏡。
阿虎