大家好，又係我蒙嘉慧（YoYo）！今日係最後一日教大家調酒，所以做法會比之前嘅難少少。今日呢一杯叫Beach嘅酒，之前我哋都只係用Shake杯去搖，但係今次我哋需要用到攪拌機，將啲冰同飲品攪勻，而且顏色方面亦可以做到紅、藍、白嘅效果，入口感覺會比較重奶味。
材料 ：菠籮汁（一安士）、橙酒（四分一安士）、橙汁（兩安士）、Gin酒（一安士）、奶（一安士）、糖水（四分一安士）、檸檬皮及士多啤梨伴杯邊。
做法 ：首先將四分一安士嘅糖水倒落香檳杯，然後用匙羮慢慢倒四分一安士嘅橙酒入杯度，切記慢慢倒。之後將冰倒入攪拌機，再倒橙汁、菠蘿汁、Gin酒同奶等落攪拌機，用機打三分鐘左右，主要將冰塊打碎為止便可，之後將完成品倒入香檳杯內，可以反轉隻羮，令飲品慢慢流入杯內，使其有層次感，最後放上檸檬皮及士多啤梨伴杯邊即可。（五之五）
明日預告：張學潤、湯寶如
口述：蒙嘉慧 筆錄：王崇穎
攝影：陳偉權 場地：XYZ
服裝：SISLEY 化妝：Dephine
髮型：King（ILColpo）