張燊悅離開星皓改簽寰亞經理人合約，日前她接受一本周刊訪問時狂數星皓，指該公司令她精神崩潰。昨日星皓老闆王海峰反指張燊悅對公司常有無理要求，終看清其為人。
張燊悅日前接受一本周刊訪問時不斷數前經理人星皓公司不是，又指自己要轉簽寰亞公司是因為不想為賺錢而無止境工作。她在星皓期間更經常要吃安眠藥，精神陷於崩潰，且每晚要看完自己的銀行存款數字沒改變才可放心入睡，家庭醫生更提議她看心理醫生。
對於張燊悅的指摘，星皓老闆王海峰昨日接受電話訪問時說：「我公司一路咁幫佢，𠵱家反而俾佢咁數落，我真係睇清佢為人，對佢亦無話可說，老實講佢未簽星皓之前，已經好多是非，形象幾負面，但公司依然用心栽培佢，明眼人都睇到佢比以前發展好咗，佢講到公司當佢係搵錢機器，我真係好想問，有邊間公司簽咗一個藝人返嚟，唔使佢做嘢都有錢畀佢使，重有佢成日三更半夜打電話嚟要求多多，我先至俾佢搞到精神受困擾。
「其實公司已盡量做到佢要求，所以佢將啲嘢調轉嚟講，我對佢好失望，明白乜嘢叫日久見人心，𠵱家佢簽新公司，我祝佢前程似錦。」
此外，星皓公司發言人陸小姐昨日在電話中亦說：「張燊悅喺公司年半，老闆對佢一直好好，但佢嘅要求就好無理，好似佢用男朋友雷頌德嘅司機同保母車，卻要求公司畀番錢，又要求公司請佢司機入經理人個部門做嘢，但公司認為唔啱規矩，冇答應。而且佢經常越級投訴，當經理人部門主管冇到，三更半夜打畀老闆要求呢樣要求嗰樣，可能佢覺得公司捧黃伊汶同林嘉欣，其實公司冇偏私。」