呢日碰到一位美國律師，佢專門做外資到中國投資嘅法律顧問，對中國法律比較熟。中國雖然大搞法制改革，但法治仍未生根，左丁山一啲朋友前幾年喺上海與人合資搞公司，合作極不愉快，中方合夥人連佢公司夾萬都搶咗去，佢告上法庭，結果係點？如泥牛入海，全無作用。
問美國律師對中國投資法有乜見地。佢話：「中國投資法律架構，源於二十年前哈佛法學院JeromeCohen教授及一位麥堅時律師行嘅律師，使用嘅係普通法概念。但中國法制沿用大陸法（continentallaw），國民黨時代已經係咁。中國嘅民法（civillaw）與投資法出自兩套唔同嘅體制，係有啲矛盾㗎，假如外來投資者與中方合資者打官司，真係麻煩到極。」
美國律師又話：「在中國投資賺錢，我只知道有兩類公司最掂。其一係巨型跨國公司如可口可樂之類，投資五年蝕五千萬美元，當濕濕碎入場費，中國亦唔敢蝦佢哋，十年左右，佢哋就會霸晒市場，賺到盤滿缽滿。第二類就係識走位，肯使錢，精過甩鞭啲香港人、台灣人，佢哋通常搭通天地線，做乜都得。至於正正經經，老老實實，依章辦事的華人投資者，統統得個桔，當貢獻畀咗國家，先至可以保持心理平衡。」騎騎，啲老實人投資中國，有時都唔知啲錢去咗邊，若非抱為中國經濟增長奉獻之心，好易短幾年命。