裕泰興董事總經理羅守耀昨日接受本報專訪，他認為鍾鎮濤雖然破產，但處理手法值得大家參考，他又贈人生格言「錢財身外物、福自在人心」，強調擁有靚衫、靚車和金錢並不代表幸福，明顯暗寸章小蕙。
裕泰興財務董事總經理羅守耀，昨日上午在其位於皇后大道中的寫字樓接受訪問時，對於鍾鎮濤（阿B）和前妻章小蕙欠下其公司二億五千萬巨債，以及阿B日前向法院申請破產一事，有不少感想。
羅守耀說：「我睇咗范姜講阿B申請破產前，同啲細路一齊去食完日本料理之後，阿B一個人坐喺公園喊，叫范姜唔好再跟住佢嘅報道，我覺得好感動。我好明白阿B嘅心態，佢係公眾人物，所以好多人注意，佢有兩個女人，之前嗰個女人（章小蕙）會帶佢去食阿一鮑魚、去半島飲茶，相反𠵱家呢個愛佢多十倍嘅女人（指范姜），食日本料理都要諗，唔可以做番之前嘅嘢，覺得虧待咗身邊嘅人。」
羅守耀續道：「阿B呢類欠債人，敢於去面對破產，好有責任感。我自己覺得，對身邊嘅人點，唔可以用金錢去衡量，應該用真心去關懷，而范姜講阿B亦好正面，做人應該豁達啲去面對人生。我自己有一句人生格言，就係『錢財身外物，福自在人心』。好多人分唔清乜嘢係開心，所謂福，係有人關懷同尊敬自己，即使冇人愛錫自己，亦要自愛。有人覺得福係靚衫、靚車同埋錢，我就唔係咁諗。」
記者問羅守耀言下之意是指何人，他說：「我知你係講緊章小蕙，佢嘅嘢等單官司settle咗先講，我並唔係針對任何人，只係想講錢其實唔係咁重要。」
問羅守耀覺得章小蕙經常着靚衫讓記者拍照及到名店購物是甚麼心態，他說：「佢嘅心態冇關係，人應該向自己交代，其他有關法律嘅嘢就要其他人配合，情理都係各有各講啫！佢嘅二百五十萬還款計劃已經唔存在，我哋唔考慮係商業決定，簡單講同數額有關。」
羅守耀續說：「阿B同章小蕙當日係投機，唔係，應該講屬於高風險投資，應該知有幾多風險，有心理準備有破產嘅一日，如果諗住一定要贏，輸咗又唔認，呢個諗法係非常之唔啱嘅。我自己鍾意阿B嘅處理手法，雖然唔可以評論為啱定錯，但可以畀啲人作一個參考。」
採訪：馮美茵
攝影：林德雄