現時香港經濟未見起色，相反國內消費意欲就相當強勁，所以近年都有不少港人相繼北上開舖，其中以時裝業較受歡迎，皆因容易打理之餘，手續亦較簡單。今天介紹的蔡先生本身在港經營時裝批發，走到深圳開時裝零售店，而且開業一個月已經成功站穩陣腳！
記者：劉耀
攝影：楊錦
蔡先生創業心得
1﹒個人：力不到不為財
2﹒選址：人流多環境好
3﹒店舖：形象鮮明突出
現年27歲的蔡先生，本身在香港經營時裝批發，近年受經濟不景拖累，生意愈來愈難做。「我從事女裝批發已有3、4年，香港的零售市道已大不如前，定單數量愈來愈少，對批發商的打擊亦相當大。剛巧有朋友認為時裝生意在深圳大有可為，當地人的消費能力大幅提高，就好似香港70年代經濟起飛的時代，所以我覺得應該做得過，於是就構思在深圳開設時裝店。」
既有多年做批發生意的經驗，蔡先生深明開舖頭必須要選擇人流多的地區，生意額才會有保證。「搵舖位除咗要夠人流之外，附近環境亦相當重要，若果附近環境欠佳，真係有客行過都唔敢入嚟，所以當初亦睇過唔少商場，後來有朋友介紹羅湖火車站附近的佳寧娜廣場，因為整個商場二樓都係賣時裝，對於店舖形象有幫助，而且更加容易吸引顧客，所以就決定在佳寧娜開舖。」
要在內地開舖，最重要申請好所有牌照，絕對不能像香港般「邊抄牌邊做生意」，否則隨時都會拉人封艇。「以前，成日都聽人講喺大陸開舖好麻煩，要申請好多種牌照，但試過先知原來冇想像中咁複雜。𠵱家羅湖對港人開舖的條例放寬咗好多，香港人已經可以註冊營業執照，喺商場開就更加方便，只要畀二千蚊左右就全部幫你搞掂晒，比起香港重方便。」經過個多月時間籌備，「MUSCE」終於在今年7月正式開業。
開時裝店對裝修特別有要求，否則怎能突顯店舖風格？
「好多時你講嘅要求，內地裝修師傅未必可以照足你意思去做，出嚟嘅效果可能唔係你原本想要嗰隻，所以最好自己跟足晒所有嘢，無論揀材料、油漆，甚至燈、螺絲都要自己親自買，到最後真係七日就可以交貨，嗰段時間如果唔係日日喺度坐鎮，點可以咁快手。」
據廣東廣大律師事務所的程律師表示，現時香港人要在深圳開業，只有羅湖商業城及東門一帶才可以以自己的名字登記。不過若果開設在商場內，手續就簡單得多，因為商場本身已經擁有營業執照，只需與商場方面訂立租約，便可以開業。
稅務計算方面，內地與香港的規則大大不同，例如有些商場會被有關當局作抽樣調查，計算所有店舖的平均營業額，再釐定出他們需繳多少稅款。換言之，就是不論生意是盈是虧，都要繳交一樣的稅款，有心北上創業的朋友就要注意了。
MUSCE開業本錢
開業日期：2002年7月
租金 ?10,000
(650呎，2個月按金1個月上期)
裝修 ?30,000
入貨 ?85,000
人工(2名) ?4,000
雜項 ?2,000
流動資金 ?100,000
總投資額 ?231,000
預計首月營業額：約?90,000
預計首月盈利：約?30,000
「MUSCE」剛於7月頭開業，憑藉在港設有批發店的關係，入貨就更加方便。「MUSCE所有款式都係由日本入口，由於香港有批發店，入貨比較有彈性，通常每星期都會由香港帶貨返嚟，若是換季時間就會更加密。」雖然開店只有一個月，不過「MUSCE」已經贏得顧客的認同，開張第三日就已經有熟客回頭。「深圳人好捨得花錢，通常搵幾多就使幾多，最高紀錄試過做一單生意已經三千蚊，而且款式在我哋嘅商場中比較少見，所以開張第三日就已經有熟客再嚟幫襯，可謂對自己打了支強心針。」現時每日約有?3000營業額，可謂已經上了軌道。
對於開業不足一個月就已經出現盈利，蔡先生雖然覺得相當滿意，但仍未感滿足。「我預計今年年底可以喺大連開第二間分店，因為大連與深圳的環境相當類似，當地的消費能力亦很高；但據聞當地治安不太好，所以對此亦有點擔心，不過暫時都只係構思當中，能否實現都要睇番生意額先可以再作決定。」
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。