港交所（388）停牌機制諮詢文件搞出個小型股股災，港交所自然責無旁貸，不過財爺一出聲就批評港交所考慮不周詳，又話港交所冇將建議詳細告知港府，擺明要將呢隻黑鑊由港交所一力承擔。
話時話，除牌機制消息早於發出諮詢文件前已在市場流傳，並有報章報道，阿松與馬局長冇理由唔知，唔通最近阿董嘅新班子，一味掛住向傳媒吹風，而唔記得收風？定係阿松刻意搵港交所一試剛剛練成嘅董氏太極推手絕招？不過無論如何，散戶於上周五嘅損失已難以彌補。
細價股雖在港交所撤回停牌建議之後反彈，但與股災前差一大截，在散戶缺乏信心下，港股成交萎縮至52.62億元。好多經紀朋友都話，散戶仍會搵機會沽清手頭上嘅細價股，至於會否轉投大價藍籌股則不得而知。𠵱家只有寄望散戶快啲淡忘呢件，否則港股有排靜，經紀就嚟連鹽水都無得吊。不過有消息話，細價股班老細可能趁機迫使港交所落實莊家制，當係向市場賠罪咁話，而72間細價股公司發出聯署公開信只係第一步，從名單睇嚟，數大莊家全部有份。
兆晉國際（491）噚日一度反彈逾倍，不過仍有不少斬倉盤出籠，令升幅收窄至85.7%，收3.9仙，成交達8065萬元。黑客話此股上周五大跌90%，醫番都嘥藥費，千萬唔好博反彈。大家不如吼實隻長江生命科技（8222），噚日反彈4.5%，收1.87元，沽壓亦減少，所羅門接貨態度回勇，貨源相信已經歸邊，始終係長實（001）旗下生化科技旗艦，點都唔會太失禮。
阿 虎