兆晉（491）上周五股價勁跌90%，噚日又升番85.7%，由於成交金額有成8000萬元咁多，令小初以為炒家好勁，但經紀陳就唱反調，直指小初唔識嘢，認為兆晉好快會再跌過。
兆晉上周五由20仙直插落2.1仙，噚日最高湧上5仙，收3.9仙，與笨豬跳之前比較，仍有好大段距離。
經紀陳話佢收到風，隻股個大莊喺股價大跌之前，已經同各路人馬傾過度水，原因當然係散唔到貨之故。上周五股價大插，主要反映佢莫財，至於50仙停牌，只係令佢勁跌嘅催化劑。
今次股價急挫，相信大莊要撲水救亡，但人哋肯唔肯就係另一回事。至於股價大升，就完全唔出奇，好多時斬倉股都有勇士落場玩，問題係噚日咁大成交，恐怕人哋都玩咗幾轉咯，𠵱家先至參與，未免遲咗啲，風險亦大咗好多。
慕容小初