「急你所急」、爭住向廣大市民問責嘅特區精英高官，閉門集思一輪之後，果然不同凡響。一向木木獨獨、表情古肅嘅經濟發展及勞工局局長葉澍堃，噚日喺立法會面對議員質詢嘅時候，面對事事咄咄逼人嘅「大嚿」陳偉業，竟然識得含笑反「寸」對方，同以前判若兩人。
件事係咁嘅，立法會經濟事務委員會噚日開會，會議本來相當沉悶，正當葉澍堃嘅物流發展工作進度討論到令人昏昏欲睡嘅時候，「大嚿」終於忍唔住要撩是鬥非。佢話政府監管乏力、規劃混亂，船隻同貨車嘅泊位都不足，點樣發展物流？葉澍堃就施施然咁話政府會好好地跟進同檢討。
呢類咁陳腔濫調嘅答案，「大嚿」當然唔會收貨，於是就嚴詞炮轟葉澍堃一輪，鬧佢答埋啲行貨，開完個「腦震盪會議」都諗唔到新意出嚟。點知葉澍堃俾人鬧完重笑，笑住咁反「寸」陳偉業：「你成日話政府監管乏力、規劃混亂，都係毫無新意、都好行貨噃！」
全場議員同記者當堂笑到收唔到口──除咗「大嚿」之外。「大嚿」俾人踩到上心口，梗係火都嚟埋，重想還拖，不過俾委員會主席田北俊窒住，話重有嘢問要問准主席，「大嚿」先肯收口。平情而論，葉澍堃噚日講物流的確冇乜新意，不過回應議員嘅幽默態度就耳目一新，唔通黃金海岸嘅海風咁勁，庸官都可以變精靈？
傳真︰2623-9278
電郵︰