陳奕迅（Eason）噚日喺香港仔蒲窩拍攝一輯板仔服裝廣告，佢着住板仔衫褲兼攞住塊滑板喺度踩嚟踩去，後尾重喺彈床上彈吓彈吓，不過Eason就話自己已經二十八歲，所以都幾吃力㗎！
講開啲歌手喺表演嘅時候夾口形唱歌，Eason原本話唔講，但係後來忍唔住話有睇樂評寫陳慧琳（Kelly）喺演唱會唱歌夾口形，而且重話Kelly個演唱會「有得睇馬戲」，擺明寸緊Kelly，不過最後佢都叫人唔好再批評。Eason又話啲人成日淨係識批評，所以謝霆鋒都唔想做，搞到連佢自己都唔想做。
Eason跟住連啲fans話買咗佢隻正版碟都要鬧，佢話：「廢話，梗係買正版啦！」
張可頤同宣萱前日出席劇集《烈火雄心II》宣傳，可頤被指暗寸宣萱。噚日可頤同文頌嫻去新城電台接受訪問時就話：「我講嘅只係中肯意見，其餘都係講吓笑啫，我會同宣萱講唔好當真，唔講又邊有得笑？」可頤又嬉皮笑臉咁話：「乜我有講過嘢咩？」
李克勤噚日幫港台《娛樂滿天星》做嘉賓，接受陳淑蘭訪問，蘭子一見克勤就猛提前港姐林穎嫻同佢嘅緋聞，不過克勤都唔弱，笑蘭子收完前男友祁文傑隻手表後，又收現任男友William嘅禮物，最後重搬埋蘭子嘅霧水情人黎明出嚟，搞到蘭子即刻收聲。
鄭中基同盧巧音首次合作主持一個諷刺時弊的搞笑節目《開心新班子》，噚日佢哋喺電視城試造型，而節目其中一個短劇要盧巧音同鄭中基反串。鄭中基已經唔係第一次扮女人，佢話：「今次我係扮一個窮女人，之前都扮過大肚婆，今次會同盧巧音做一對夫婦，講窮媽媽同富爸爸嘅生活。」
余文樂同胡杏兒噚日喺沙田新城巿廣場，為日本資生堂護膚品嘅Pureness護膚系列做代言人。佢哋都可以一世任用呢隻牌子嘅產品，重齊齊接受皮膚測試。胡杏兒嘅皮膚比較乾燥，而余文樂面部嘅T字位就比較多油。余文樂話：「我以前未入行都唔點理皮膚，但𠵱家又要化妝同落妝，都真係要注意。」
關心妍噚日喺跑馬地拍攝新歌《無話再講》MV，同一個貌似金城武嘅模特兒Leon合作。關心妍同Leon拍呢首傷心嘅情歌時，有面貼面嘅鏡頭，關心妍原來現實中都有過一段刻骨銘心嘅愛情，佢話：「我同前男友分手三年，但之前一直有聯絡，糾纏不清，直至呢半年先冇聯絡。我希望將來可以搵個固定男友。」
寇鴻萍同男友梁廷鏘噚日喺尖沙嘴洲際酒店出席「資訊通」記者會，寇鴻萍透露佢同男友籌備喺上海開第二間采蝶軒，重會同林伯個仔林建康合作。而港姐出身嘅寇鴻萍就睇好今年幾位鬼妹仔港姐能夠脫穎而出，佢男友重笑話個姓奇怪就一定得，咁啱寇鴻萍個姓又咁特別，莫非佢想順便讚吓女友？
原子鏸同楊吉璽噚日喺尖沙嘴文化中心綵排音樂劇《仙樂飄飄處處聞》，佢重專登換咗兩套衫，其中一套係一件淺藍色婚紗，佢話未試過着婚紗着得咁舒服，不過今次做音樂劇令原子鏸最頭痛嘅，係要全部用廣東話講對白，好彩今次音樂劇票房都唔錯，而且重宣布加開一場，令原子鏸嘅付出都冇白費。