紅磡摩天豪宅海名軒火速賣咗一百四十幾個單位，為長實帶嚟差唔多三十億收益，重帶挈美聯沙田瑞峰分行阿頭曹仕賢攞獎。唔好誤會係發展商嘅銷售大獎，其實係美記上半年住宅最top主管獎。
曹仕賢對蘭西講，佢哋分行上半年做咗成百單成交，佣金超過六百萬，海名軒雖然得五單，不過佣金就有百幾萬，等於平時一個月佣金收入。佢話上半年五成買賣嚟自本區，主要係做瑞峰花園、火炭同大圍豪宅，一手主要係海名軒同大埔滌濤山。
瑞峰分行只有十名員工，本區同外區，新舊樓乜都做。曹仕賢覺得同客戶建立朋友關係，提供有用資訊，加上有耐性，係做到數嘅原因。佢透露曾經有客睇咗成百個單位先至落鎚。
瑞峰分行攞到獎，重因為有一員猛將物業顧問KennyHo，Kenny上半年做咗62萬佣，榮登住宅部topsales，Kenny擅長做大額買賣，佢個人做咗兩間海名軒（總值四千萬），另外最大碼嘅單位差唔多有三千萬。
Kenny入行七年，98年蟬過別枝，冇耐又回巢。由於佢喺瑞峰分行做咗一段日子，同啲客好熟，近排廠家入市買豪宅，開正佢嗰瓣。聽講Kenny最威水嘅戰績，係幫玩具大王蔡志明買咗七個沙田寶松苑單位，總值過億。
曹仕賢向蘭西透露，今個月因為做咗幾單皓朗山莊，所以條數都差唔多有一百萬。睇嚟佢哋好有條件繼續保住佣金收入最多嘅「一哥」地位。
新地今年嘅重頭傑作珀麗灣，就快隆重登場。先嚟一個「頭盤」，就係耗資成五百萬製作費嘅三分鐘短片嘞，噚日舉行首映禮，喺葵芳新都會廣場一座六樓售樓處播放，隆重程度同真正戲院首映禮一樣。
段短片類似廣告片，將珀麗灣周圍環境、交通等基建配套、社區設施，同埋模擬單位外望嘅景觀化成影像，配合強勁嘅數碼杜比立體聲同超闊螢幕，「卡士」都幾似大電影㗎。咁震撼嘅短片，一個鐘播六次，至於間「迷你」影院，聽講用咗成三百萬裝修，座位有六十六個，連埋企位約四十個。
新地陳秀賢重話，葵芳新都會嘅售樓處，成二萬呎，裝修費成千萬，有幾靚整幾靚。噚日蘭西出席完首映禮，就見到成百人排緊隊，一睹呢個花費不菲嘅售樓處嘞，果然夠號召力。
近年酒店同服務式住宅大行其道，除咗外籍人士，港人都係吸納對象，所以不時都有招攬港人嘅優惠計劃推出。
北角海逸酒店，𠵱家將部份四百方呎嘅房間，以月租最低八千蚊招租。不過，只有喺8月入住先可以享有呢項優惠，而且重要出示香港身份證至得。
另外，恒隆喺油柑頭嘅汀蘭居，最近減租搶生意，以前月租六千八，𠵱家六千有交易。同行又有乜招數回應呢？
有謂不問蒼生問鬼神，尤其係𠵱家民生怨氣咁深，政府又幫唔到佢哋。香港不嬲都係標榜自由嘅地方，好似宗教咁，廟宇、教堂同神殿呢啲唔同教派嘅建築物，四周圍都係。
蘭西最近睇到一個規劃申請case，有人想喺元朗流浮山上白泥，起間為期三年的臨時泰式佛教廟宇，但係可能申請人重未準備好足夠資料，所以要求城規會押後審理。
間廟佔地有成十五萬方呎，起好之後睇怕夠晒莊嚴。但係泰國有咁多佛，究竟會請邊位嚟呢？香港人，特別係啲明星藝人，好鍾意拜四面佛，同埋搵白龍王指點迷津。如果呢間廟起得成，重請到白龍王嚟坐鎮一排，香火想唔鼎盛都難。到時啲明星唔使去咁遠搵白龍王。相信佢哋到時首先要白龍王指點嘅，係點樣避開狗仔隊。
聯邦酒樓逆市擴充業務，啱啱買咗葵涌華星工業大廈19樓四千八百方呎，用嚟貯存食品同材料，美聯物業工商部區域經理陳偉志話，單位售價只係82萬，每呎171蚊，創該廈歷來新低。
個價比同區市價平差唔多一成半，再睇翻五、六年前，漢寶酒樓買入葵涌和宜合道工廈每呎造價三百幾蚊比，今次個價就相當抵。聽陳偉志講，酒樓食肆鍾意買舊式工廈做貨倉，最主要都係因為價錢平，而聯邦酒樓在九龍、荃灣區有唔少分店，揀葵涌區亦方便運貨。
尖沙嘴漾日居喺過去嘅周末有十六宗成交，係各貨尾盤之冠。
中原劉一姐劉英琳噚日好高興咁對蘭西講，佢哋兩日做成八單漾日居，有過百萬佣金，喺咁淡靜嘅日子，又難怪佢開心嘅。
劉一姐話幫襯佢哋嘅客，好多都係身家豐厚嘅家庭，買嚟投資。當中有兩個買家就特別啲，係外籍人士陪同華人妻子嚟買樓，兩夫婦年紀都係三十幾歲，重有個BB㖭。聽講呢兩對夫婦，一對買咗個833呎價值四百幾萬嘅單位，另一對就買個1168方呎單位，成五百幾萬。
啲客曾經喺分行問過盤，經同事轉介過嚟嘅。
漾日居咁好賣，主要都係因為發展商肯減價，而中記每單收2.5%佣，所以就有過百萬數嘞。
蘭西
電郵地址：