上兩個禮拜講起日本仔趁Yen價高來港入波鞋，點知撞入假貨黑店，經紀李讀後來電，問所講假波鞋店是否位於月餅場？呢勻被佢考起，只好聽佢爆料。
據經紀李講，原來早排原宿班日本仔來港，想搵香港出晒名各式各樣嘅關刀波鞋，香港班接待人唔知有心定無意，竟然帶成班人去月餅場頂層，最出名嗰間假波鞋舖，成班日本仔見到二十幾款科時擺喺面前，好多只賣一張金牛有找，港元疲弱，計落平日本一半有多，重唔搶快付上現鈔咩。
日本仔返到原宿祖家，四出向親朋好友宣揚香港月餅場有間咁正嘅波鞋店，經一傳十、十傳百之後，呢間波鞋舖竟成為日本仔圈中嘅推介正店，間舖每月淨係做日本仔生意都夠食。
經紀李：「嗰度啲科時手工好勁，同花園街或羅湖商業城比贏足一條街，有人話佢用真模但假料做，但我就唔信喇。假就係假，多個藉口咪多個賣點賣貴啲。不過好多人想知最初邊個香港人帶班日本仔去嗰度，相信只有問袁仁祥就最清楚，話晒佢係月餅場嘅睇場。」
主持人：大食Jack
八卦熱報：