上周五個別Call輪逆市而升，果然有啟示。恒指昨日大幅反彈202點，升幅2.1%，Put輪多數冇運行，Call輪則威番1日。
大市雖然升，但唔係隻隻Call輪都有得威，早幾日推介短炒賺咗錢嘅恒指Call輪9174，昨日就不升反跌3%。9174逆市而跌，其中一個原因係上周五偷步，升定先，但更重要嘅係隻輪8月29日到期，再過多兩日就係8月，溢價開始縮得較快。
另一件熱門恒指Call輪9201，上周五一樣偷步，但昨日仍升5.5%，皆因佢比9174長1個月命，溢價暫時未縮得咁快。
其實9174同9201溢價都係嫌高，只因成交旺，短炒客多數揀佢哋。如果睇好後市，諗住揸耐啲，應該開始留意年期較長嘅恒指Call輪，例如9390同9408。
長實（001）昨日發威，股價急升2.5元，收60.5元，升幅逾4%，如果外圍相就，短期內有機會升多兩三蚊。想搵長實輪短炒，最啱玩始終係9252，貪佢成交大轉身易。不過隻輪9月初到期，遲吓溢價會縮得較快，宜炒不宜揸。
章 盛