夏日球驗客：
「老費」硬頸恐曼聯變老人院

英格蘭傳媒爆料話曼聯領隊費格遜又想簽韋斯咸嘅迪肯尼奧。有人話老費對佢情有獨鍾，係因為隻臭馬響性格同踢法上都有啲似當年愛將簡東拿；又有人認為呢個係老費嘅脾性──話咗要買就一定要到手為止。
老費以前斟舒寧咸、白蘭斯、雲尼斯達羅同埋華朗，雖然都遇過阻滯，但最終都得手（即使比預期遲咗一季、兩季，甚至三幾季），亦因為咁，佢執教曼聯咁多年好少買人失手，基本上得舒利亞同沙拉斯。但話時話，佢買咁多「遲來的猛將」，遲早令曼聯變老人院。

雲拿保斯賣「李奧」謀私
李奧費迪南離開列斯搬去曼徹斯特，當然要出讓佢間價值百幾萬鎊嘅靚屋。估吓邊個最有興趣買佢間屋？列斯領隊雲拿保斯是也。據聞雲拿保斯睇中間屋好耐，唔通佢肯賣李奧費迪南，就係為滿足私慾？

阿根廷小將正「出爐鐵」
唔知係咪沙維奧拿同埋列基美都重係細個，響巴塞隆拿第一場熱身賽輸畀一支法國低組別球隊後，教練雲高爾就「省」咗佢兩個一餐。哈！到第二場熱身賽，列基美就表現神勇，沙維奧拿亦交足貨仔，最後贏瑞士洛桑二比○。所以話呢，啲細路真係唔教唔得㗎！