暑假過咗一截，暑期工又返得七七八八，有啲銀両傍身，都係時候去個旅行先收拾心情返學。無論去邊，出門旅遊唔單止要有機票、護照同信用卡，記得要帶埋部PDA。皆因PDA有唔少有用軟件係為旅遊而設，出門有佢幫手夠晒方便。
記者：招佩珊
部份攝影：黃子偉
Model：Polly
出外旅遊最基本要知當地時間、氣溫及貨幣兌換，要有齊亦唔使分幾次Download，一個WorldMate就搞掂，有齊世界時鐘及地圖、天氣預測、外幣兌換、各國的電話區號，連英、美、歐、日唔同制式的衫褲鞋襪尺碼都可以查得到。
售價：US$19.95（約HK$155.6）
拉大隊去旅行，齊齊食飯、搭車同耍樂，一時阿甲埋單，有時阿乙有散紙用埋先，阿丙話簽開卡順便畀埋錢，八、九個人最後要計番每人畀幾錢真係計到頭都痕，而BillSplitter出呢個軟件就可以記低各項支出兼分帳，只要先輸入有份分擔支出的人數同人名，而每次付款時就輸入由邊個畀、銀碼以及幫邊個成員畀錢等資料，最後睇個支出平衡報告，就會計算出各人要分擔的數目，例如阿甲要夾幾多，阿乙可以收番幾多錢。
售價：US$12.95（約HK$100）
就算有多次出門經驗，每次都要用紙仔寫低要帶乜，執行李時就逐項剔。MyLuggage就等同於呢張紙仔，物件只要輸入一次就會有紀錄，每開一張新的行李清單時，亦可記埋目的地、日期同埋件行李係屬於邊個，帶一部PDA就可以幫成團人記低所有資料。
售價：US$8（約HK$62.4）
睇書係旅行最佳解悶方法，PDA勝在就算Download十幾本電子書都唔會令件行李增磅。要睇書，部PDA首先要安裝中文系統，然後裝如TealDoc、AportisDoc、CSpotrun、iSilo等呢類電子書軟件。網上流傳的PDA版電子書眾多，但合法的中文作品就較少，商務網上書店便是其中一個提供合法Palm版電子書的網站，現時約有30本可供選擇，例如有陳德運、周國珍的《世界寓言》及盧思源的《名人雋語》，每本書的下載費用為$40，不過，要睇呢個網站內的電子書，就要下載NeovueReader呢個電子書軟件。
搭長途飛機或者坐火車，未必人人都可以瞓足全程，唔睇播完又播嘅電影可以打吓機，自家精選的Palm遊戲點都吸引過飛機上的過三關，以下呢兩款Game長期都咁受歡迎。
日本係旅遊兼掃貨熱點，雖則日文夾雜住漢字可以估估吓，用身體語言亦可以幫你一把，但最佳方法就係裝番個字典軟件Kdic中的英日字典，輸入英文字就可以顯示日文解釋，遇到雞同鴨講時只要畀對方一睇，佢就會明白晒，而佢個字庫約有6萬多個字。
售價：US$9（約HK$70.2）