近期，香港市場迷你車當道，其中炙手可熱會係本田Jazz車系，就連老大哥嘅豐田Echo，銷量相比起來亦望塵莫及㖭！而最近日本傳來消息，本田車廠會喺嚟緊9月，響當地推出1.5公升版本嘅Fit（即港版Jazz），馬力有成110匹咁多，兼且重響原有一套CVT無段變速波箱中，加入軚盤按鍵+/-7個波檔變換㖭！實行大玩小跑車風格，以迎合年輕人口味噃！
之不過，亞Mark最近收到風，話代理方面未必可以響香港同步推出，事關𠵱家賣緊嘅1.3公升版本Jazz，重有大批定單未兌現嘛！若然各位對新版1.5公升型號有興趣嘅朋友，就不妨忍耐多一點，或許年底前會有望到港都唔定㗎！