港股跟隨美股反彈，恒指噚日大升202點，收9975。雖然港股升勢頗為全面，大有大升，細有細升，但成交只得52億元，則反映投資者驚魂未定，談股色變。不過，另一邊廂，期指市場則非常熱鬧，如果美股噚晚繼續升（外圍標普升約10點），期指今日有機升穿1萬點結算。
恒指如果反彈未完，究竟邊隻大藍籌做火車頭呢？噚日表現最威係長實（001），升2.50元，升幅4.3%，收60.50元；其次係和黃（013）及新地（016），約升3.7%；大笨象滙豐（005）升2%，中移動（941）升1.7%。睇番5大藍籌日線圖，以滙豐率先現轉機，股價升破短期降軌，9RSI亦升破短期降軌，若以升穿下降楔形計，量度升幅可見91元。不過，噚日成交太薄弱，始終令人信心唔大，驚佢走勢突然急轉，其實上個禮拜初，好多人都驚滙豐會跌穿80元。
至於其餘4隻藍籌股，技術走勢大致相同，都係升穿5日線，受阻於9RSI短期降軌，走勢雖冇滙豐咁強，但已經有改善，假如齊齊出現突破，將可扭轉港股短期弱勢。
港股今日升跌對後市走勢相當重要，趙飛雲亦摩拳擦掌，準備出擊。
趙飛雲