地鐵將軍澳坑口站上蓋發展權，上個月底由信和同嘉里聯手奪得。佢哋連隨掛起兩幅廣告，強調呢個係「環保露台海景豪宅」，重畀埋電話號碼等大家查詢。唔通呢個住宅重災區，競爭真係激烈成咁，要晨咁早做宣傳？好似端午節前兩個月就有賣糭廣告，月餅重誇張，中秋節三個月前已鋪天蓋地做行宣傳，舊時阿嫲嗰代興做月餅會，成年前就開始供會㖭。真係行船爭解纜，月餅我食先。
呢個可以話係創最快做宣傳紀錄嘅樓盤。究竟𠵱家發展商可以提供啲乜嘢資料畀有興趣人士。咁早做定宣傳，睇嚟無非想攞客嘅反應同資料。街坊日日見住呢個廣告，想唔記得有呢個盤都唔得啦！咁發展商嘅宣傳就收效嘞，係精神攻略嚟㗎。
坑口站上蓋會起六座住宅，共2133個單位，重有近四萬方呎商場，聽講個盤會有環保露台同工作平台，面積就由六百幾呎起。預計後年落成，咁即係話，明年初就可以賣樓花嘞。
想買呢個盤嘅買家，要好抵受得誘惑先至得，因為呢兩年市場有大把平靚正嘅樓盤推出發售。
另外考吓大家，睇睇圖中兩幅廣告，有乜唔同呢？
答案係其中一幅多咗地鐵個名，聽聞係信和同嘉里掛咗幅廣告 (圖一) 幾日，發覺漏咗地鐵，好似唔係咁好，所以即刻換過幅新嘅（圖二）。