古天樂、劉青雲同應采兒噚日去咗藍灣廣場，出席電影《絕世好B》嘅宣傳活動，同場搵咗三個BB嚟搞氣氛，其中兩個重係孖仔㖭。
佢哋三個演員分別要餵BB食手指餅，青雲對住個BB表現得好啖定，見個BB一喊就塞嘢食入佢口。後尾青雲話，𠵱家都係適當時候，都會同老婆郭藹明考慮生番個BB。
而古仔負責嘅BB就成日扁嘴，後來重喊起上嚟，搞到古仔要自己食晒啲手指餅，個BB咁唔識貨，唔知會唔會恨到古仔嘅fans流口水呢？而古仔餵餅唔成功，就將個BB拋上拋落，真係牙煙喇！古仔就話將BB拋上拋落只係想氹BB，重話BB成日喺片場喊都幾煩，至於應采兒個BB就不停咁喊，搞到佢好尷尬。
張惠妹（阿妹）嘅新唱片會喺下個月推出，而佢近日不停做宣傳。阿妹日前重為主打歌《狠角色》拍攝MV，要喺氣溫高達攝氏三十二度下工作，曬到成隻「燒豬」咁，但係阿妹都毫無怨言。
由於見到有份拍攝嘅小狗出現中暑嘅迹象，所以工作人員就向阿妹同小狗射水降溫。
曾志偉、錢嘉樂同林曉峰三位獎門人主持，噚日喺奧海城出席「吾係獎門人之吾係送飛大行動」活動。不過噚日朝六點左右，已經有婆婆喺奧海城排隊等攞飛。志偉對於觀眾咁踴躍，晨早排隊攞飛，同F4有得比，佢就話說：「係咩？咁勁，因為我哋係E3嘛。」
早排傳去夜總會玩，之後又搶雜誌記者攝錄機嘅陳小春，上個禮拜六去咗馬來西亞為「2002Astro新秀歌唱大賽」做評審同埋表演嘉賓，佢唔知係咪因為呢單新聞影響，心情唔多靚，未上台之前，已經坐喺台下木無表情，完全冇笑容，後來上到台，司儀喺台上搞氣氛，小春仍然係黑口黑面。
前晚劇集《皆大歡喜》一班演員喺無綫參加遊戲節目《一觸即發》，最終由馬蹄露勝出。起初馬蹄露試玩時重驚到騰晒雞，完全冇諗過自己會贏，而謝天華試玩跌落深洞時重專登唔要提示，佢話：「冇提示重驚，增加刺激感。」
陳彥行同薛家燕噚日出席何文田廣場嘅開幕活動，家燕姐話《皆大歡喜》嘅演員十一月會出唱片，其中有首歌係為鄧兆尊同行姐度身訂做，歌詞重好煙韌，行姐話：「啲歌詞會同兆尊打情罵俏，歌詞中重有幾句『哎呀！』但大家唔好諗邪嘢。」
莫文蔚（Karen）、韓尚志、李思蓓、戴辛尉同梁焯滿，噚日出席喺銅鑼灣舉行嘅「寶寶夏日寵物鬥一番2002」活動，現場有寵物表演比賽。愛心爆棚嘅Karen話，佢屋企都有養貓養狗，早排重收留咗隻流浪狗，不過最近轉送咗畀朋友。
張耀榮有意為啱啱申請破產嘅鍾鎮濤喺紅館籌備演唱會，張耀榮前晚喺蘇永康演唱會後嘅慶功宴上話：「暫定喺下個月二十六同二十七日，𠵱家等紅館批場地。」問到張耀榮會唔會畀多啲歌酬阿B，有冇二億五千萬咁多錢時，佢話：「二億五千萬日圓呀？睇吓到時點。」