不少香港人到內地創業，都會選擇開食店，就像有20年經驗的大廚盧生，在今年3月於番禺祈福新邨食街開了一間食店，因為四周粵菜及外省菜林立，要突圍而出，惟有標奇立異。剛巧葡菜在國內開始漸受歡迎，盧生便決定以葡菜「候駕」，結果贏得街坊口碑。
記者：羅蘭 攝影：Kenny
在香港經濟高峯期有6間餐廳的盧生，自言因經濟蕭條而被迫到內地創業，他最初是想在上海開餐廳，但最後都是選擇到番禺的祈福新邨食街。「上海係我創業嘅理想地方，因為嗰度潛力大，奈何租金好犀利，加上我睇中嘅地點租期只得一年，重可能有清拆嘅危機，所以惟有放棄。咁啱有個朋友係祈福嘅住客，佢介紹我嚟呢度開食肆，而我亦覺得呢度人流唔錯，就試吓喺呢度做起點，攞到經驗後，希望遲兩年可以到上海大展拳腳。」
盧生開業前發覺這條食街24檔食肆中8檔是做粵菜，於是他便選擇以葡菜做賣點，迎合港人上內地度假的心情。「以前我喺半島酒店做過大廚，又開過Canteen，所以做西式餐廳完全難唔到我，而我哋嘅大廚對葡式菜亦好在行。我雖然做咗老闆，但每日朝六晚十都喺度企足咁耐，呢幾個月嚟，我無放過假，亦無落過香港。」
令盧生不放心放假的其中一個原因，是這兒的員工質素跟香港差得遠。「呢度嘅員工轉數幾低，做嘢要踢一踢郁一郁，講過嘅嘢又唔記住，尤其係外省嚟嘅，所以要花好多時間培訓。例如個客話：『唔該一杯檸檬可樂。』佢哋會話有；但如果話『一杯檸樂』，佢哋就會話無。重有佢哋企喺度時對眼唔係睇實啲客，而係一隻眼睇緊無綫，另一隻眼睇住亞視（餐廳內有兩架電視機），真係好惡搞，所以我決定唔再請外省員工。」
此外，盧生話在內地做生意有很多事情是意想不到。「好似每逢五一、七一、十一、年尾等呢類日子，政府部門都會上嚟收取檢查費，每次五、六百蚊。而星期五、六、日喺內地買海鮮又會比平日貴四蚊斤，又多冒牌貨。食物來源重頭痛，好似一罐葡國臘腸，澳門賣42蚊，喺珠海賣62蚊，廣州賣86蚊，我惟有去珠海買。火腿又好似豆腐咁，連麵包嘅味道都唔同，都要叫人喺香港帶上嚟。」
現時餐廳客人中佔了六成是香港人，其餘四成是內地人。「我哋呢度嘅主打菜係咖喱炒蟹、豬扒包、葡國雞等，尤其是豬扒包，最高紀綠一日賣成70個，蟹就一日賣40隻，最高營業額嗰日有萬幾蚊生意。」
為了可在食街站穩陣腳，盧生設計了幾款燒烤包套餐，價錢由?15至?22不等，方便屋邨內的居民燒烤時購買。
1. 投資額鬆動：內地有好多突發性的收費是預計不到
2. 要穩守突擊：不要期望在兩三個月內回本
3. 了解水電煤供應：以祈福食街為例，間中會有突發性停電，那便不能做生意
4. 清楚勞工法例：最好跟員工在合約上訂明，免意外發生才討論賠償問題
1. 個體工商營業執照
2. 消防合格證
3. 衞生許可證
4. 環保費
5. 稅務登記證
＊費用合共約?990，時間約需兩個星期
番禺律師事務所
電話：（20)84809348
開業日期：2002年3月
租金 ?16,200（每日營業額抽取13%作租金；面積約1,900平方呎）
舖租按金 ?20,000
頂手費 ?120,000
裝修 ?120,000（連廚房用具、枱櫈、杯碟）
入貨 ?50,000
人工（共18人） ?20,000
員工宿舍（兩間） ?5,000
管理費 ?2,100
水電 ?20,000
雜費 ?20,000
流動資金 ?60,000
總投資額 ?453,300
平均每月營業額：?150,000
平均每月盈利：?20,000
「如今我最希望仍然係到上海開舖，因為佢係我嘅理想地方。我會努力喺祈福打開市場，因為如果呢度做得好，我就可以開多幾間分店，對日後去上海好有幫助。」
聯絡我們
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。