上周美元開始回升，而美股亦同時反彈，可能係造淡嘅對沖基金開始平倉食胡，睇番佢哋嘅手法，其實同97年衝擊亞洲各國差唔多，都係股滙一齊來。未來一段時間，美元嘅走勢對股市有相當大啟示。
美股上周五全面上升，杜指再升78點，收8264，並重返10日線之上（現處8221），走勢似營造旗形，可能有機會試一試8500至8600水平，如果真係咁，恒指亦有機追隨先反彈。
事實上，港股技術走勢現時較美股杜指差，反覆向下嘅趨勢仍冇變，短期策略主要仍係趁升近阻力位不破買Put輪，直至恒指技術走勢出現轉勢迹象。短期較大阻力位係上周六提過嘅由7月初延伸至今嘅下降軌，目前約處於10160，若升近回頭，可伺機買恒指Put輪短炒。另一方面，假如升破則有機會上試更大阻力10400。
港股明日期指結算，目前仍有超過4萬張未平倉，淡友繼續壓價結算並唔出奇，如果恒指今日完全補回去年9月尾上升裂口9663至9602，則港股可能要再跌深啲先至有反彈。
上周六講過，滙豐（005）走勢將成港股關鍵，如果滙豐守穩頸線84.50元唔穿，港股先出現反彈機會較高。
趙飛雲