上星期一（七月二十二日）喺《國際先驅論壇報》睇到一段原載於《紐約時報》嘅新聞，覺得幾好笑，不妨與《蘋果》讀者分享。
話說美國新澤西州大西洋城，係美國東岸嘅著名賭城，距離紐約市唔遠，每日都有巴士自紐約市唐人街載華人前往大西洋城賭錢。賭場嘅生意經第一條就係：有客到。賭場名言係：不怕你精，不怕你呆，最怕你唔來。來到賭場咯喎，點都會落注，一落注就會輸，賭場開心晒。所以美國啲賭場常以不同花款吸引人客，如平到笑嘅酒店住宿費、免費餐飲等等。大西洋城賭場就索性向每位人客送價值二十美元嘅贈券。
唐人街每日都有好多退休人士（多來自中國大陸）坐巴士到大西洋城。一位LindaZhang女士，六十歲，住在皇后區客棧，每晚租金十美元。佢每日坐十一蚊巴士（來回票價）去大西洋城，入賭場攞番張二十元贈券，即係淨賺九美元，然後就周圍行，先行去長老會教堂嘅長者廚房，免費食一餐先，然後周圍睇風景，夠鐘就上巴士返紐約，日日如是。
近年好多中國大陸老人家移民到紐約與家人團聚，收入好少，屬於貧窮一族，但華人係聰明人，冇耐就發現賭場係長者天堂，日日去大西洋城行街食免費餐。據講大西洋城啲賭場發覺被利用之後，好唔高興，對啲華人好唔客氣，昅到實，有歧視之嫌，但啲大陸老人家以前受過不知幾多痛苦，邊會介意吖，繼續玩殘賭場。