通常大市跌，恒指Call輪會跟住跌；正股散，相關Call輪亦會散，但上周五個別Call輪走勢反常，值得花啲心思，諗吓有冇暗藏玄機。
目前掛牌買賣嘅恒指Call輪有7件，其中4件喺上周五逆市而升，1件冇郁，兩件下跌。升嘅恒指Call輪當中，包括最旺場嘅9201同9174，當日呢兩隻輪合共成交超過3500萬元。恒指上周五再跌111點，大市氣氛極差，點解有人掟咁多錢買Call輪？
滙豐（005）上周五先挫後揚，相關Call輪跟住升，冇乜特別。不過，新地Call輪9253就有啲奇怪，當日正股（016）跌1元，跌幅近2%，但9253卻升4%，唔係乾升㗎，成交逾4500萬元，重多過地鐵（066）。
中移動（941）同日大跌3%，兩件Call輪9302同9324卻分別上升10%同9%，成交唔多，但加起嚟都有150萬元。
近日外圍市場已起變化，美元已回穩，兌日圓及歐元在過去1周回升逾2.5%，金價則1周下挫20美元。𠵱家飛身入去炒Call輪，可能太過冒險，但係玩開Put輪者應慎防市況逆轉。
章盛