日前本欄曾經為大家報道過，被譽為係928接班人嘅新款保時捷高性能跑車後，最近又收到消息，話保時捷車廠將會以快將推出嘅Cayenne作設計平台，推出一款馬力高達450匹嘅Pick-up，並以美國市場為主要銷售點。
消息指出，新車嘅車首造型與Cayenne相似，但就會改為雙門及開放式尾斗設計，形象既富跑意之餘又具吸引力，車廂配備亦會略為修改，但仍會保持有濃厚跑車氣息；另外預算新車會以一台V8柴油偈作動力核心，馬力輸出約450匹，不過此車嘅確實配搭，仍有待廠方於2005年公布有關資料後，方可作實。有興趣嘅車迷，就要留意日後關於此車嘅消息喇。