蘭西每次去尖沙嘴文化中心採訪政府土地拍賣，都畀啲發展商走甩，因為場地既密封又四通八達，想追到佢哋行蹤，小啲轉數同腳骨力都唔掂。但喺國內就好做得多，日前去深圳市土地房產交易中心，睇兩幅寶安區市中心地皮拍賣，見到間「琉璃拍賣場」，即時成個人興奮晒！發展商有乜𠵱郁，都一目了然，想靜靜地鬆人都難！咁就唔使怕漏咗新聞畀老細鬧啦！
拍賣過程中，記者雖然唔可以為所欲為，間中會有警衞叫：「請記者退後一啲，唔好阻住視線。」比香港劃定採訪區，重要俾人用圍欄欄起，真係差天共地。
地皮賣出後，拍賣官會要求投到嘅發展商舉起個牌，等記者影相，認真識做。最過癮就係拍賣結束後，會即刻簽約，佢哋有佢哋簽約，記者就四圍訪問、影相，交換卡片等。