新菜牌：
夏日葡式海鮮菜　酸辣醒胃

今年夏天熱到火滾，高溫令人胃口大減，點算好？不如先從色水入手，精緻賣相加新鮮材料，由視覺勾起興致；然後是酸辣齊出擊，在味覺上來個大刺激，喚醒熱懵了的食慾；希望憑這雙管齊下，可望衝開胃口，在葡式美食面前大開食戒，吃個捧腹而回。

記者：楊一凡　攝影：陳智良
ImageGirl：Tammany

POUSADAvillaportuguese夏日新推介
葡式青椰菜湯$38
香蒜牛油焗原隻帶子$48
馬交焗蟹蓋$56
香辣蜆煲$62
＊安東尼奧海鮮燴飯$148
＊葡式烤珍寶蝦$188
秘製葡式香辣雞$88
紅白酒燴羊膝$128
＊推介菜式

安東尼奧海鮮燴飯$148
乍聽燴飯二字，是否令你想起芝士、牛油加白酒的意式燴飯？咁肥，嚇怕啦！經理安東尼奧都係咁話，所以特地炮製少油燴飯迎夏日。先用洋葱、蒜茸、茄醬、白酒和海鮮湯燴白飯，最後加入海鮮，聽落唔油膩，食落好開胃。

Tammany試味：
海鮮份量好多，飯粒充滿番茄酸甜，入口濕濕哋又鮮味，好開胃。

馬交焗蟹蓋$56
別小覷這只掌心大小的蟹蓋，食半個已經飽飽哋，材料雖然離不開蟹肉、蟹膏、洋葱、砵酒、啤酒和威士忌，但份量較一般食肆多，塞至整個蟹蓋滿滿的，好充實，果真童叟無欺。

試味報告：
鋪在表面的軟芝士和麵包糠，豐富口感，餡料焗好後有點乾身，不妨柯打杯白酒，食住飲。

葡式烤珍寶蝦$188
大蝦身上塗滿葡式辣椒油PiriPiri，那是橄欖油浸切碎鮮紅椒、香草和茄茸，浸足兩日確保夠辣，方可使用。PiriPiri色水金黃，睇個款唔辣得去邊啦？錯嘞，蘸兩滴就足夠你飲半杯冰水，如今成隻蝦都係，咪講笑。

廚師Scott試味：
KingTigerPrawn大隻得嚟，肉質好爽，加些少辣調味，既可帶出鮮味，夏天食又零舍開胃。

紅白酒燴羊膝$128
大廚覺得紅酒的味道太搶，需要加入白酒去中和一下，這樣羊味就可盡情發揮出來，所以在燜羊膝時特地加入白酒、紅酒和黑醋，去皮的羊膝需要在兩個半小時內，盡量消脂盡情索汁，務求做到軟熟入味。

試味報告：
有白酒從中調和，燒汁的味道不會太搶，羊肉軟熟得輕輕一扯就甩皮甩骨。

香辣蜆煲$62
這個蜆煲實在太熟口熟面啦，且慢吖，今夏新意注入香辣汁當中，大廚在傳統醬汁即番茄、洋葱和蒜茸醬當中，加入切粒的煙火腿和葡國香腸，然後一拼攪成茸，加白酒和橄欖油炒香，最後加蜆，原煲登場。

試味報告：
蜆肉在酸甜中還帶有煙熏香味，全因大廚加了煙火腿和葡國香腸，令醬汁香濃惹味。

香蒜牛油焗原隻帶子$48
充滿蒜香的牛油配鮮帶子，似乎有點平凡，怎樣才能煮出不平凡呢？其實海鮮經過愈少的烹調步驟就愈好味，店方選用本地帶子，加白酒和牛油，連殼焗7分鐘，簡單不失原味。

試味報告：
帶子靚笠笠，看似油咗些少，但無牛油帶子會好乾身，入口不會像現在這麼多汁。

店名：POUSADAvillaportuguese
電話：23355515
地址：西貢白沙灣滘西新村112號（觀音廟側）
座位：100個
付款方法：現金及信用卡(A.E.,Diners,Master,Visa)
營業時間：星期一午巿休息，晚上6時至11時；星期二至五中午12時至下午3時，晚上6時至11時；星期六及日中午12時至晚上11時半。