上周五細股價風雲色變，若有股仔能夠企穩唔跌，甚至逆勢上升嘅話，其實只有兩個可能，一個係質素正到你唔信；另一個當然係街外無貨，而幕後又冇沽貨之故。
其中一間以前叫做和順，家陣叫做中國特種纖維（285）嘅股仔，雖然唔係毫子股，但都係二三線股一族，股價就好硬淨，上周五企硬喺1.42元收市。
隻股52周最低係50仙，最高就係1.47元，可想而知隻股完全無視近期疲弱嘅市況同細價股股災。
上周五兵荒馬亂之時，佢逆市升1仙，成交重有700萬元，各位就知事件幾唔尋常。
據聞幕後以往按咗手貨畀人一事重未搞掂，究竟因咩事隻股企得咁硬呢？
經紀陳就話市場傳聞，因有個大戶玩場外衍生工具所致，但呢樣嘢向來透明度低，除非係圍內人，否則真係好難知真定假，至於一般散戶，就更唔應該亂咁掂。