今屆圖圖盃賽事，睇嚟又會係法國球隊威晒，里爾、特魯瓦及索塞斯三隊都順利過關去到第四圈，比起德甲同埋意甲都各死剩一隊、英超同西甲都係得兩隊，法國球隊嘅成績真係特別搶眼。
其實照我求大俠睇，佢哋有咁好嘅表現，多少都同佢哋個法甲聯賽季通常比較早啲展開有關，因為球隊早咗為賽季備戰，狀態就自然比要到九月至開「咧」嘅意甲及西甲等球隊好啦！
重有就係，法國球隊要喺歐洲賽事如歐冠盃及足協盃等與列強爭一日之長短，睇嚟重未夠班數，咪惟有喺圖圖盃呢類級數較次嘅比賽中，盡全力爭取成績，望晉級可以打多幾場，又可以多啲收入幫補吓囉！所以要玩圖圖盃，法國球隊真係捧場客恩物嚟㗎！
喺世界盃之後，你估全隊英格蘭最攰係邊個？領隊艾歷臣是也！呢位瑞典籍領隊喺世界盃後好多「分唇」都以攰為理由冇出席，連佢嘅副手基比都話擔心。睇嚟艾歷臣真係要向中國前教練米路天奴域學吓嘢喇，因為米路連番「走穴」，都毫無倦容。
英超班霸曼聯嗰件新波衫，正版要八月一日先有得賣，每件四十鎊（約五百港元），但曼徹斯特嘅酒吧喺三個月前已有得賣，不過係「老翻」，只賣三鎊一件，而最近英國海關亦喺曼徹斯特機場截到一批由泰國運嚟嘅曼聯老翻波衫。叫得做老翻，梗係差少少，好似「madeinEngland」（英格蘭製），就變咗「madeinEnlang」，都咪話唔搞笑。
英超升班馬西布朗嘅球員，前日史無前例咁發表聲明，話球會冇信用，之前答應咗佢哋每人每場一萬五千鎊（約十八萬港元）嘅贏波獎金，𠵱家縮水，要再傾過，又話對球會好失望，冇晒士氣。西布朗喺開季前搞單咁嘅嘢，我求大俠就奉勸想下注於佢哋身上嘅球迷，都係喺季初睇咗辦先算喇。