一直認為廁所是污穢不堪的地方，即使是生活上的必需品，仍難登大雅之堂，最近市面出現了一系列由香港原創，以廁所為題材的廁郎&Friends精品，精品全以廁所內的馬桶、廁紙、鮑魚刷等作造型，全部都生動搞笑，而每個人物都有其積極樂觀的生活態度，想有快樂人生，參考吓佢哋嘅生活態度啦！
記者：區佩嫦 攝影：伍慶泉
咁多精品之中，小記覺得八達通套最實用，好似這系列的八達通套，顏色夠晒鮮豔，套上的造型又夠別致，不妨買齊全套，日日都可以唔同款。
售價：$10（LOFT）
攬住個廁所，感覺雖然唔係幾衞生，但睇見廁郎一派得戚嘅表情，小記不禁攬到佢實一實，一攬發覺廁郎個樣除咗夠Cute之外，重非常舒服。咕𠱸內藏有極之軟熟的棉花，一攬就唔想放手。除咗得戚的廁郎咕𠱸外，重有廁紙Sophie，同樣係好攬到你唔信！
尺寸：約21吋高、14吋闊
售價：$248（LOFT）
放完暑假就開學，各位同學仔準備好文房四寶未呢？不妨考慮呢個用燈芯絨布製成的筆袋，上面繡有全身及大頭公仔，夠晒可愛。小記覺得筆袋尺寸夠大，可以放大量文具，極為實用。
尺寸：3吋半高、9吋半闊
售價：$58（永安）
由於廁郎係主角的關係，所以大部份產品都以廁郎為主，好似呢對布拖鞋，用上柔軟的燈芯絨做，鞋底設有防滑膠粒，加埋鞋面內藏着又厚又軟的棉花，着上腳夠晒舒服，畀到你十足的保護。不過小記最欣賞都係鞋面上的廁郎公仔，一路行塊廁板重會郁吓郁吓，極之搞鬼。
售價：$148（永安）
這個紙巾套亦是力Sell廁郎個Kawaii樣。可愛的廁郎坐在紙巾盒的邊沿，笑笑口的表情，望見佢絕對可以令你忘憂解困。而紙巾套用上軟燈芯絨布製成，放入洗衣機洗都得。
尺寸：約3吋高、10吋闊、5吋深
售價：$118（LOFT）
講到精品，點會少得經常要你「掛」住佢嘅鎖匙扣呢？這個軟身的鎖匙扣，用薄身燈芯絨布製成，雖然有成5吋高，但又輕又軟，再加上其可愛造型，絕對係人見人愛。造型方面，有廁郎、Sticky、Punky同埋小記最鍾意的尿兜Johnny，個個都咁得意。
尺寸：約5吋高
售價：$48（永安）
雜物多多的你，經常搞到房間七國咁亂的話，這個紙製櫃桶仔絕對是你的好拍檔，兩格櫃的設計夠晒實用，放MD碟又得，放文房四寶都得，唔用的時候又可摺起收藏。不過最得意係櫃桶仔上有齊廁郎同佢一班朋友的公仔圖案，夠晒可愛。
尺寸：約4吋高、7吋半闊、9吋深
售價：$20（永安）
呢本《LetgoLet'sgo》的故事書，除咗有廁郎平日的生活或者佢和朋友嘅人生哲學外，重有其他富寓意的小插圖，有興趣不妨買嚟睇睇！
售價：$50（LOFT）
店舖資料
永安（28521888）
上環永安百貨二樓創意堂
LOFT（29713831）
金鐘太古廣場西武百貨專櫃
查詢電話：25270027