自從財爺阿松同跳水皇后霞女嘅千里情緣曝光之後，好多人都成日期望佢哋早日拉埋天窗，噚日八方突然收到一份據說係由財爺身邊「線人」報料嘅密報，話阿松同霞女兩個星期前去咗美國秘密註冊結婚，一對新人啱啱喺上禮拜日晚由美國返港。
阿松同霞女秘密註冊結婚咁大件事？八方即刻四出偵查，發現上個禮拜阿松果真請咗假離開香港。
八方打過長途電話去最多名人鍾意去嘅賭城拉斯維加斯查過，又查唔到有新郎哥阿松嘅名。另外，有線人又向八方報料，一個星期前某日，有人親眼目睹阿松同霞女同坐一車經過皇崗海關。
阿松噚日入咗屯門黃金海岸閉門集思，八方搵人請佢都唔肯出嚟回應，霞女又冇回音，最後消息都無人能夠證實，不過八方諗嚟諗去都諗唔通：阿松同霞女如果真係要註冊結婚，點解唔揀喺偉大首都北京而揀美國呢？