李華度即將加盟AC米蘭嘅消息一出，唔單止令AC中前場球員怕無正選踢而人心惶惶，連AC同市宿敵國際米蘭都受影響。據講國米本來已經完成組軍，但敵會失驚無神簽件猛人，搞到佢哋嘅高層要重新部署──真係多得李華度唔少。
據講國米會長莫拉堤同教練古柏最近密密斟，傾緊一旦AC簽入李華度，佢哋又會搵咩人。冇計啦，米蘭雙雄水火不容，除咗鬥戰績之外，重要鬥埋面子同星味。好似當年AC簽入舒夫真高，國米亦唔執輸，耗巨款買入韋利；舊年AC買恩沙基、雷哥斯達，國米亦搵咗托度同馬達拉斯，慌死會失威咁。
講開轉會，保頓雖然同皇馬達成協議，買佢哋嘅西班牙後衞甘普，不過後者就話點都唔去保頓。或者好多人覺得甘普好儍，因為皇馬都話唔要佢喇？不過我求大俠就覺得，保頓不過係間會仔，皇馬就係歐洲大會，甘普寧願留喺皇馬都正常呀！
曼城領隊基瑾果然不脫佢嘅吹水本色，新一季英超聯都未開始，佢就話有信心攞前六名！雖然曼城前線有安歷卡壓陣，不過後防就難俾人信心，龍門舒米高更加英雄遲暮。唔好忘記曼城上次一升班就即刻要降班，基瑾都係唔好咁大口氣好。
碧咸前日喺英聯邦運動會冇理賽會禁穿有贊助商服飾嘅指示，居然喺九百幾萬英國電視觀眾面前同自己嘅贊助商adidas賣晒廣告，賽會事後亦完全冇向碧咸投訴或者表示不滿。梗係啦，英聯邦咁弱雞又冇乜星將撐場嘅運動會，難得請嚟碧咸主持揭幕禮，已經求之不得啦，重投乜鬼訴啫！
超過兩年冇攞過獎盃嘅森柏斯，據聞會同佢喺九五至○一年合作嘅教練安納干尼「復合」，謀求衝破呢個悶局。但照我求大俠睇，呢位美國球手自從娶咗嬌妻同破紀錄贏咗十三面大滿貫錦標之後，求勝嘅心態已經唔同晒，睇怕今次再換教練幫助都唔大。