嗰日李家祥同記者唱K，重拉埋暑假回港嘅乖女寶怡唱幾嘴。講開寶怡就犀飛利咯，十二歲就同父母話想去英國讀書。八方心諗：唔通咁細個就知香港教育制度唔掂？李家祥兩公婆雖然唔捨得，但諗到送個獨女去外國，讀書之外重可以學吓獨立，於是忍痛答應。勢估唔到寶怡又真係幾獨立，一眨眼就去咗英國幾年，一啲都唔黐家。李太笑笑口話：「我哋嘅長途電話費單一啲都冇多到！」慳錢事小，見到個女長大至係真正高興。
十八歲嘅寶怡今年秋天就會喺英國升讀大學，會唔會繼承父業讀會計呢？乖女耍手擰頭，原來阿女心頭好係政治、哲學、經濟。寶怡重好肯定話讀完書會返香港發展，但佢自認興趣廣泛，將來未必一定從政咁話。
﹙圖﹚李家祥、太太（左）同乖女寶怡（右）同唱一曲，梗啱key啦！
傳真︰2623-9278
電郵︰