家長唔好以為送咗仔女去外國浸鹹水就係一定好㗎啦，就嚟正式做教育統籌局局長嘅「KingArthur」李國章噚日就喺大氣電波中，話佢自己二十多年前去咗劍橋大學讀醫，嗰時嘅日子真係唔易捱，間中重會思飯香，因為「原來外國係冇飯食，餐餐都係食薯仔咋！」
即使經濟唔好，近年嚟反而愈嚟愈多家長送仔女去外國讀書，而且重有年輕化嘅趨勢！李國章勸啲家長真係要三思，擔心會影響親情，又降低對香港歸屬感，佢話自己當年都係衰好奇，以為外國好好玩，唔係對香港嘅大學冇信心，點知去咗先至識得驚！
話番轉頭，兩位李公子都係去咗外國讀書。李國章解釋話，係因為兩個仔都係喺外國出世同埋受教育，返到嚟香港佢哋就入咗英基學校，條路一定要去外國讀大學；𠵱家見到兩個仔英文頂呱呱，但係講到中文，「佢哋兩個除咗鬧人時中文會好啲」之外，其餘嘅就好唔掂，所以佢都好擔心。
咁難答嘅問題李國章都兜得番，真係抵佢做局長啦！
傳真︰2623-9278
電郵︰