劉青雲、李克勤、上山詩鈉同囡囡、黃秋生阿媽同佢個仔黃銳銘（前名黃一一）、林敏驄一家、顧紀筠母子，重有十二位候選港姐等，前晚去咗銅鑼灣，出席新片《小馬王》嘅首映。而關之琳就同好友金燕鈴個囡囡喺附近行商場買護膚品。
青雲有份為《小馬王》配音，佢話：「我係幫一隻馬嘅角色配音，主要講佢嘅內心世界。」青雲身邊有一個着紅色T恤嘅小朋友同一位老太太，青雲話：「佢係黃秋生個媽咪同秋生個仔。」平時秋生甚少帶埋個仔出席公開活動，估唔到小銳銘都幾有乃父之風，面對鏡頭一啲都唔怕醜。
而克勤就應邀幫《小馬王》唱主題曲，克勤都關心張栢芝話要休息嘅傳聞，佢話：「我同栢芝都好朋友，大家講義氣，我即管勸吓佢。佢咁叻女，唔會逃避。」不過栢芝前日就話咗唔會暫別娛樂圈。
十二位「2002年度香港小姐競選」嘅候選佳麗，噚日去到南海作親善訪問，喺當地出席植樹活動，其間2號楊康寧同7號余詩韻都分別俾在場圍觀嘅市民要求合照同索取簽名，其中2號楊康寧重俾現場嘅市民讚係最靚嗰個港姐，相反連奪兩個獎項嘅20號嘉碧儀就冇人理會。
張栢芝噚日廣發聲明予傳媒，佢重申對於日前被追問有關謝霆鋒同王菲嘅結婚消息時，佢回應：「人哋嘅事唔到我理，第三者唔應該給予任何意見。」張栢芝喺聲明度解釋佢嘅意思係指人哋嘅事，外人冇權發言，栢芝否認自認係「第三者」，又否認當日唱歌時眼濕濕。
楊思琦、汪明荃、林峯同鄭少秋早前去咗北京，為無綫新劇《血薦軒轅》開工，林峯同思琦都肥咗，𠵱家要努力減肥，佢哋話：「雖然喺當地食嘅嘢好油膩，但有時阿姐會煲湯畀大家飲，感覺好溫馨。」林峯重話秋官穿上古裝只可用一個字嚟形容，就係『型』呀！
盧巧音噚日喺時代廣場出席一個活動，佢重即場獲贈一部數碼相機，Candy話自從戴咗媽咪送畀佢作為嫁妝嘅戒指後，工作接踵而嚟。
至於媽咪係咪想催婚，Candy話佢媽咪都係求其講吓。而Candy透露自己喺出完第一張唱片之後，都曾經諗過退出，但最終都覺得唔可以半途而廢，同埋𠵱家終於知道娛樂圈呢個遊戲點樣玩。
胡杏兒噚日喺電視城參加《一觸即發》，佢喺綵排嗰陣，試跌落個窿時嗌到鬼咁大聲，後來佢話：「我第一次上呢個節目，所以好驚。」
胡杏兒最終喺節目成為大贏家，得到十六萬幾嘅獎金同價值十五萬嘅獎品，而杏兒會將一半獎金捐畀慧妍雅集作慈善用途。
陳敏之噚日喺銀線灣廣場出席無綫節目《娛樂大搜查》祝捷儀式，敏之因為對眼發炎，所以要戴番副黑超，佢話：「因為眼部化妝太多，加上有近視同埋散光，要戴隱形眼鏡，所以經常發炎，我考慮緊遲啲去做激光手術。最近可能生活太緊張，重內分泌失調，連經期都兩個月一次。」
王秀琳（Mango）同周永恒噚日出席喺沙田舉行嘅活動，Mango戴住太陽鏡出現，佢就解釋話：「我又生眼挑針，醫生話唔可以化妝，所以要戴住太陽眼鏡。」
另外，周永恒一見記者就話：「我前幾日去太子道睇結他，點知見到個三十幾歲男人隨街大便，真係好核突。係我就寧願賴落條褲度。」