李心潔憑電影《見鬼》票房大收一千四百萬而吐氣揚眉，當年她在台灣做歌星出身，因為處女唱片不暢銷，令她受盡白眼，幸好遇上張艾嘉這位人生中的伯樂，令到她的事業起飛，同時她也渴望自己將來能成為張艾嘉的接班人。
李心潔在人生中曾遇上兩個伯樂，一個是台灣的製作人Rachel，另一個是張艾嘉。回想從前，李心潔也覺得那段日子很不堪，她說：「我由馬來西亞去台灣嘅時候好痛苦，一個人過去，又冇乜朋友，又唔知點做一個歌手，到後來我發現鍾意唱歌同做歌手係冇關係，做歌手之後，見到好多好現實嘅人。
「當時我出嘅第一張碟唔賣得，全世界都否定咗我，最難過嘅係全世界都放棄我。我讀書時係一個好有自信同開心嘅女仔，自從呢張碟後，我冇晒信心，好沮喪，好彩後尾我遇到一個喺我生命中好重要嘅人，佢係一個好好嘅製作人Rachel，佢幫我做第二張唱片《自由》嘅時候，畀番好多信心我，好尊重我嘅任何說話，呢張碟重令到啲人開始接受我。」
而張艾嘉則是心潔的恩師，當年心潔在一個新人選拔賽中，被張艾嘉發掘。
「張姐（指張艾嘉）係一個非常有愛心嘅人，我好欣賞佢對生命嘅態度，好積極，佢發掘咗我出嚟，之後我簽咗滾石，其實佢可以唔理我，但佢見我一個人喺台灣，重好關心我，真係好難得。
「直到年幾前，我簽咗張姐做經理人，大家至真正合作，我同張姐有緣份，我當佢好似媽媽咁，關係好似一家人，即使唔係工作關係，我一世都會愛呢個人。」
其實，李心潔的性格和作風跟張艾嘉很相似，不知她有沒有想過做張艾嘉接班人？她笑說：「無可否認佢係我一個大目標，佢對我人生影響好大嘅一個人，張姐只希望我成長，幫我接嘅工作唔係賺錢行先，而係睇份工作可以幫到我有幾多，佢係好遠視㗎。」
前年，李心潔憑主演的電影《愛你愛我》，勇奪柏林影展的新人獎，是她事業上的第一個高峯。今年，張艾嘉為她接的電影《見鬼》，令她踏上銀色旅途的第二個高峯。她在片中，飾演一名盲眼少女，接受眼角膜移植手術後，開始看見鬼，每天生活在無比恐懼之中。
「我喺呢套戲入面好多喊戲，每次我喊完，都要匿埋平復情緒，拍呢套戲係用盡我嘅精神同時間，所以我啲朋友都好擔心我會精神分裂，但好彩最後都能夠平復心情。」
結果，《見鬼》票房爆冷，收過千萬，但她說：「今次只係一個開始，呢排有好多人搵我拍片，除非可以令我超越《見鬼》嘅演出，唔進步嘅我係唔會考慮。」
《見鬼》更帶起鬼片潮流，鄭秀文主演的《我左眼見到鬼》，也明顯是受《見鬼》效應影響，李心潔說：「所有嘅嘢我都預計唔到，我冇諗過拍完呢部戲會係點。」
《見鬼》的成功亦令李心潔被選中在一舞台劇中，扮演少女鄧麗君一角，她說：「壓力大到不得了，我會擺晒自己嘅所有時間喺呢套舞台劇度，唔理最後反應點，至少我對得住自己。」