地盤工人欠薪事件，已有多起，總之麻煩多多，基本原因只有一個，就係市道不景，因財失義，啲判頭良莠不齊，管無可管。建築呢行，係唔係嚇怕人呢？咁又未必，呢日睇到建造業訓練局（建訓局）嘅一份新聞稿，有啲意料之外。建訓局話：「學子面對升學問題，如覺得對文、理、商興趣都不大，不妨考慮投身建造業，修讀建訓局的基本工藝課程或建造業管工/技術員訓練課程，免學費，每月有津貼，結業後有就業介紹，去年度基本工藝課程結業學員平均就業率高達九十六巴仙，每月薪酬六千至八千餘元，而管工及技術員訓練課程平均就業率亦高達九十七巴仙，最高入職薪金為九千五百元。」建訓局又講得幾好景喎，究竟需要乜嘢入學資格？
建訓局話，只要年滿十五歲或十七歲，具中三或中五程度就可報讀。讀完就做地盤工人或裝修工人，如泥水粉飾、粗細木工、油漆粉飾、水喉潔具、雲石裝飾、金屬工藝……
今日社會上咁多雙失青年，失業率又高，去報讀建訓局嘅兩種課程（即十五歲中三讀基本工藝，十七歲中五讀管工技術員），不失為一個搵工方法，讀書受訓有津貼收，讀完有工做，條件好唔錯啫，不過係唔係逢報名必取錄，左丁山唔知噃，有興趣嘅，不妨打電話到建訓局問清楚，電話係2903-0696，上網就搵