雖然李心潔只得二十六歲，但卻像一個無根的人，她在馬來西亞的鄉土小村出生，在那兒過了二十年的簡樸生活，然後跑去台灣五年，再到內地及本港發展。
「我覺得留喺邊度都唔緊要，轉環境就當係每隔一段日子，就有新嘅衝擊。但以前有段時間，我的確會覺得唔知個家喺邊，究竟我係屬於乜嘢地方？我會喊，但𠵱家呢啲感覺減退咗，我重後生，當自己係流浪者咪得囉。」
李心潔家有一父一母三弟，她說：「我同家人一年見得兩、三次，真係好掛住佢哋。次次見親媽咪，佢都好心痛，佢總係問點解我瘦成咁。所以我返親屋企，佢都會整好多嘢畀我食，而每年嘅農曆新年我一定會返去，大家都會留喺屋企團聚。
「揀得呢條路就會少咗同家人相處，係有少少遺憾，但我同家人喺心入面嘅距離係好近，佢哋係生命中最重要嘅人。」
李心潔是一個隨遇而安的人，她對愛情亦一樣，說起來總是淡淡然的。
她表示自己已經兩年未談過戀愛，她說：「我同之前嘅男朋友，分咗手兩年啦，我都唔知點解咁耐冇拖拍，天下間咁多男人，我都以為好快會拍拖，或者係緣份未到啦，愛情係需要時間去培養嘅，所以要搵一個適合自己嘅男朋友都好難。」
撰文：朱芷瑩 攝影：陳慧安 服裝：MiuMiu（黑色上衣、牛仔短裙）
化妝：AngelYip 髮型：O4byMorrisTsui 場地提供：Twentyoneandtwentyonebar