對於謝霆鋒打算暫時退出娛樂圈和結婚的消息，不少圈中人持不相信的態度，劉德華更勸霆鋒要三思而行。
陳奕迅： 霆鋒係二十一歲嘅小朋友，都未到成家立室嘅地步，可能佢想休息下啫！我嘅生日願望（Eason今天生日）係乜都畀晒霆鋒，希望佢唔好咁大壓力，冇咁多是非，唔開心嘢快啲遠離佢。
容祖兒： 霆鋒有乜決定我都會支持，我唔知道佢嘅私事，但我唔擔心佢休息會令人氣跌，呢行講實力嘅。
張燊悅： 霆鋒嘅決定我會支持，咪叫佢生埋仔囉！
陳冠希： 我唔信！我前幾日先同佢傾過偈，如果係佢會話畀我聽，退出同結婚我都唔信。每個人想做就應該去做，自己開心乜都得，放假每個人都想，等我聽日上北京幫你哋問吓佢。霆鋒好堅強，每個人發生咁嘅事都會好辛苦，如果發生喺我自己身上，我都唔知點做。
劉德華： 年輕人要諗清楚先，說話講咗可以收番，做嘢就要自己面對，好多嘢唔係想像中咁壞，但凡事都要三思而後行，事業係自己嘅。令自己開心嘅嘢可以做，但唔可以影響到人。退出唔啱佢，唔係佢呢個年紀做嘅嘢，唔鍾意香港咪去台灣同去荷李活發展咯，唔適合唱歌可以拍戲，再唔係拍電視劇都得，我都係咁啦！
馮德倫： 我兩樣都唔信，霆鋒咁後生，不過佢近排又真係黑仔啲，但係雨過總會天青，都頂咗咁耐啦，叫佢頂埋去啦，我都明白佢嘅壓力好大，如果佢真係結婚咪恭喜佢囉。
陳文媛： 如果霆鋒真係退出，我覺得好可惜，佢咁有才華，可能呢排好多唔開心嘅傳聞先令佢諗埋唔好嘅嘢。