最近外國有消息傳出，謂保時捷車廠正有意繼Cayenne後，研製一款全新超級跑車，以滿足一班保時捷及高性能跑車Fans嘅要求；新車除有機會以Coupe形象出現外，更有可能以旅行車形式示人，就連強勁引擎輸出亦係賣點所在。
雖然未有關於此車嘅詳細資料，但從預想圖中可以睇到新車嘅造型，與先前曾於大型國際性車展中展出嘅GTCoupe相似，當中低斜頭燈組合及流線型車體設計，就最能將呢個特點展露出來。車廂布局亦會以跑車化為主，除備有跑車軚環及腳踏外，當然唔少得重有一雙桶形跑車座椅，但仍有待廠方公布有關資料後方可作實。然而，預計廠方會為其裝上一台4.5或5.4公升V8引擎，馬力輸出甚為強勁，加上一套四驅系統，從而令其有更出色嘅性能表現，難怪有人話呢部新跑車會係新一代保時捷928啦。若有關於此車嘅進一步消息的話，我哋會再為大家報道。